Kurdistanî de CHP kewt binê sifirî

10/02/2010

Semedê înkarkerdişê meseleya kurdan û şarê kurdan ra, CHP bi kurbanê polîtîkayanê xo ê şaş û teşkîlatanê CHP’î yew bi yew Kurdistanî de yenê girotiş. Hetanê ney demî CHP waştişanê kurdan yew zî nîarda ca û her tim verê waştişanê kurdan ze pûtê xo daya vindarnayiş û probleman daha zî xorî kerda. Endamanê CHP Çelê (Çûkûrca) de nêmend. Yanê xo kerd sifir. Dêrsim, Colemêrg, Şirnax, Êlîh, Sêrt û zaf cayan de endamanê CHP 100-200 miyan de ya. Wan, Mêrdîn û Mûş zî navenda pêroyina xo ra pêrodayişan mîyan de yê. 43 CAYAN DE SIFIR O CHP’a Çelê ya Colemêrgî gere kongre bîyamaynê viraştenê, ema semedê ke endamî çînê ra, rapor, kişta lijneya rayîrberdoxa navendî ra ame wendiş û ame eşkerakerdiş ke, semedê ke endamanê humara înan 22 bi, na gam çîno û bîyo sifir, nêşenê kongreyî bivirazê. Raporî verê ney raporî de eşkera kerdî bî ke, 32 qezayan de semedê ke endam îçînê ra kongirey nîyameyê viraştene. Rapora newe de no humar resayo 43 cayan. 29 QEZAYAN DE BINÊ 50 Mîyanê Colêmêrga Şemzînan, Baxçesaraya Wanî, Doganşehra Sêwasî û ze nînan 29 cayan de endamê CHP na gam binê 50 kesan de yo. Raporî de CHP vano, semedê vengaheya rayxistişî ya zî çînêbîyayişê rayxistişî na gam humara ney cayan 20 o. Raporî de hîrê qezayan de endamî binê 50 kesan de yê, ema roparî de ca nêdayê nameyanê ney cayan ra daha zêd bal onceno. Hetê Çêlê, Çankiri de qezayanê Atkaracalar, Korgûn û Yaprakli de zî, semedê enedamî çînê ra kongre nêvirazyayo. Yanê CHP Tirkîya 43 cayan de semedê ke enedamî çînê ra kongre nêşkena biviraza. Cayanê ke no gam paya vindenê zî, semedê ke CHP înkar û îmhaya kurdan de israr kena ra nerehet ê. ÎSTÎFAYÎ ZÊD BENÊ Alîkerdoxê CHP Onur Oymen di derheqê qetlîyama Dêrsimî de qalî kerdbî û zaf bertekî nîşan girotibî. Ney ra pey 3 şaredaranê CHP û 400 endamanê ay CHP ra îstîfa kerdîbîy. Semedê ke polîtîkaya CHP’î a kurdan sero şermezar kerdîy ra, navenda CHP’î aşma citmeha 2009 de, serekê CHP’a Dêrsimî Cemal Ozaslan û 11 rayberdoxanê ci, Nezîmîye de serekê qezayî Aydin Kandîl û 11 rayberdoxanê ey, gurera girotibî. Hîrê roj verî zî, ramana xo eşkera kerdbi û ardibi ziwan ke polîtîkayanê CHP semedê ke kurdan çînê hesipneno û çaresereya ney zî nêvîneno ra polîtîkaya CHP şaş vînen û ez hetê polîtîkaya CHP ca nêgeni. Û wina domnabi: “Ez 1992 ra naşt ney partî de gure keni. Hetanê ney waxtî CHP mixê zî qabê kurdan zêxm nêkerdo. Ez nadertişê CHP’î ê kurdan weş nêvînen ra, waştişnameyanêy xo ê îstîfayî eşrawit merkeza pêroyine.” MHP ZÎ ZE CHP YO 10 serranê peynî de weçînayişan de MHP tenê di Îdir de, CHP zî Îdir û Mêrdîn de bendava seyî 10 ravêrayê. CHP Îdir de1999 de weçînayişan de seyî ra 12 girotbi. 2002 de no berzê 14 ‘î. Weçînayişê peynî de no humar dakewt seyî ra 4.32 giroto. No zî dano eysayiş ke şar ey zî qebûl nêkeno. Erzirom de seyî ra 1..9 ra dakewt 0.75’an. Amed de 0.87 ra dakewt 0.45’an. Êlîh de 1.53 ra dakewt 0.29’an. Riha de 1.23 ra dakewt 0.4’in. Kurdîstanî heme de tenê Semsûr û Meletî de rayanê xo tikey zaf kerda û Sêrt de zî 0.69 ra berz kerdo 1.84’î. ENQERE - ANF