Ji polîs û parêzeran tifaqa qirêj!

30/01/2010

Li Stenbolê polîsên girêdayî TEM’a Emniyeta Stenbolê ji bo ku welatiyê bi navê Şehmuz Avci qanûna poşmaniyê qebûl bike bi hevkariya parêzerên girêdayî Baroya Stenbolê ew bi “xwîşkên te di destên me de ne, heke tu qebûl nekî em ê tecawizî wan bikin” tehdît kirin. Şehmuz Avci ji bo ku parêzer û polîs bên darizandin gilî kir. Emniyeta Stenbolê ku di demên dawî de binpêkirinên mafan derketiye asta herî jor bi pêkanîneke din hate rojevê. Derket holê ku polîsan di bin çav de welatiyek bi tehdîha tecawizê qanûna poşmaniyê dane îmzekirin. Şehmuz Avci ku di 21’ê kanûna 2009’an de hatiye binçavkirin rastî vê pêkanînê hatiye bi nameyeke ragihand malbata xwe. Bûyera navborî wiha pêk hatiye: Şehmuz Avci yê ku ji Amedê ji bo bixebite bi xwîşkên xwe re hatiye Stenbolê li taxa Kazim Karabekîr a Esenlerê bi cih bûye. Polîsan bi îdiaya ku têkîliya wî bi bûyera molotofavêtinê ya di 2006’an de heye bi ser mala wî de girtin. Polîsan li malê demeke dirêj lêgerîn kirin û di vê navberê de heqeret li xwîşkên wî yên bi navê Gulistan û Nurtenê kirin. Şehmuz Avci jî hate binçavkirin û ew birin TEM’a cadeya Vatanê. Li vir polîsan bi îdiaya ku têkîliya wî bi bûyera molotofavêtina otobuseke heye û di encamê de 2 kesan jiyana xwe ji dest dane qebûl bike û qanûna poşmaniyê îmze bike (madeya 221’emîna ya TCK’ê) rastî pêkutiyan hat. Piştre jî parêzerên girêdayî Baroya Stenbolê yên bi navê Ozkan Arikan û Gulşah Sozerî ji bo ku ew qanûna poşmaniyê qebûl bike bi wî re axivîne. Di vê navberê de xwîşkên wî jî ji bo aqûbeta birayê xwe hîn bibin hatine emniyetê. Polîsan berê wan jî dana parêzer Ozkan Arikan. Arikan herdu xwîşk biriye qata 3’yemîn a emniyetê û bi Avci re hevdîtin daye kirin. ‘EM Ê TECAWIZÎ WAN BIKIN’ Piştî ku derdikevin jor polîs li cem parêzeran Avci bi gotina “xwîşkên te weke ku tu jî dibînî di destên me de ne. Em dikarin her tiştî bi wan bikin. Em mala we jî dizanin. An tu dê poşmaniyê qebûl bikî û biçî cem wan an jî gelek tişt dê bê serê wan, em ê tecawizî wan bikin.” tehdît dikin. Li ser vê yekê Avci her tiştî qebûl dike û îmze dike. Avci di 24’ê kanûna 2009’an de dema ku derdikeve dozgeriyê dibêje ew qanûna poşmaniyê qebûl nake. Li ser vê yekê tê girtin û wî dişînin Girtîgeha Tîpa F a Tekîrdagê. Avci ji wir xwîşkên xwe re name dişîne û dibêje hatiye tehdîtkirin. Her wiha xwest ku polîs û parêzerên ku bûne şirîkê polîsan bên darizandin. PIŞTRAST KIR Xwîşka Avci, Gulîstan Avci jî bûyer piştrast kir û got ku polîsan dema serdagirtinê de heqeret li wan kirine û bi gotinan ew tacîz kirine. Bi gotina “êdî dema we hat, hûn ji kû hatinê hûn ê biçin wir” hatine tehdîtkirin. Gulîstan Avci wiha axivî: “Piştî ku birayê min hate binçavkirin em li emniyetê geriyan. Ji me re gotin bi perêzer re hevdîtinê pêk bînin. Dema ku em çûn ber emniyetê Ozkan Arikan em pêşwazî kirin. Gote me ‘werin ez ê we bibim cem irayê we’. Me birin odeyeke. Birayê min hat, lê gelekî nerehet bû. Nehîştîn em biaxivin û em derxistin. Piştre em hîn bûn ku bi me, birayê min tehdît kirine. Gulîstan Avci diyar kir ku nehîştine parêzer Asya Ulker birayê min bibîne, gotine “naxwaze te bibîne.” Avci got ku ligel ku birayê wê parêzer Ozkan Arikan û Gulşah Sozerî nexwestiye jî bi polîsan re birayê wî tehdît kirine. Ji ber vê yekê jî ew pir bi fikar in. GILÎ KIR Şehmuz Avci bi riya parêzera xwe der barê polîs û parêzerên ku bi polîsan de hevkarî kirine gilî kir. Avci serî li Komeleya Mafên Mirovan (ÎHD) Stenbolê jî da û ji ber ku pêwira xwe xirab bi kar anînê li Baroya Stenbolê jî gilî kir. Parêzer Asya Ulker ê jî weke şahid îmze avêt. STENBOL - DÎHA