Konferansa wêjeya kurdî

02/12/2009

Konferansa navneteweyî li ser edebiyata kurdî li Bajarê Sine yê Rojhilatê Kurdistanê tê sazkirin û kesên bixwazin berhemên xwe bişînin konferansê divê herî dawî heta 20’ê adara 2010’an gotarên xwe bişînin. Ji bo mebesta lidarxistina konferansa wêjeyê ev tişt hatin gotin: ‘Edebiyata kurdî di gelek hevraz û nişîvan re derbas bûye. Heke em derhatina edebiyata kurdî ya piştî Îslamê ji zaravayê Goranî û ji kurdên Yarsan bizanin hingî em dikarin sedsala sêyem, ku gelek helbestên bi zaravayê Goranî mane ji wê sedsalê, wekî serdema destpêka edebiyata kurdî destnîşan bikin. Lê belê di çax û serdemên din de zaravayên din, wekî Hewramî, Kurmanciya bakur û Soranî, bi erka zimanê standard rabûne ji bo helbestvan û nivîskarên kurd. Edebiyata kurdî di rabirdûyê de ketiye bin tesîra gelek rewt û tevgerên roşinbîrî û dînî û her wiha danûstandina wê digel edebiyatên welatên cîran jî hebûye. Bi vî awayî edebiyata kurdî berê xwe daye rê û dirbên nû û cihê. Lewma, layenên navborî û gelekên din bûne sebebê wê hindê ku em konferansekê bi rê ve bibin li ser pêşketin û tekamûla edebiyata kurdî ji destpêkê heta îro. Em hêvîdar in ku ev konferans bibe destpêkek ji bo hewlên manend di dahatûyê de da ku edebiyata kurdî bi ronahiya boçûn û ruwangeyên cihê bê tehlîlkirin.’ Lijneya zanistî ku di konferansê de cih digirin ev in; Mamosteyê Zanîngeha Kurdistanê Saleh Adibî, Mohammad Iranî, Jamil Jafarî, Nawid Naxşibandî, Ahmad Parsa, Moşen Pişwaee, Abdulah Rasoulnejad, Hadi Rezwan, Baxtiyar Secadî, Hasan Sarbaz, Asaad Şêxahmadî Mamosteyê Zanîngeha Îslamî ya Azad li Sineyê Cemal Ahmadî, Lêkolînerê edebiyata kurdî Adnan Barzanî, Mamosteyê Zanîngeha Îslamî ya Azad li Sineyê Mohammad Xalid Xaffarî, Lêkolînerê edebiyata Kurdî Rahim Loqmanî, Lêkolînerê zimanê kurdî Mansur Rahmanî, lêkolînerê edebiyata kurdî, Macid Ruhanî. Armanca lidarxistina konferansê wiha hate birêzkirin: ‘Naskirina layenên cihê yên edebiyata kurdî, naskirina fakterên ku tesîrê li stîl û çeşnên cihê yên edebiyata kurdî dikin, vekolîna merheleyên dîrokî yên edebiyata kurdî, vekolîna asta tesîra di navbera edebiyata kurdî û edebiyata welatên cîran de’ Mijarên ku di konferansê li ser bên rawestandin ev in; ‘ Folklor, çeşnên edebî di edebiyata kurdî de, vekolîna dîroka edebiyata kurdî, stîlên belave di edebiyata kurdî de, rewş û payeya zaravayên kurdî di edebiyata nivîskî de, danûstandina di navbera edebiyata kurdî û edebiyatên neteweyên din de, pêwendiya di navbera edebiyata kurdî û qesrên mîrên kurdan de, kêş û erûz di helbesta kurdî de, Erk û kardayên kultûrî û civakî yên edebiyata kurdî, Rexneya çavkaniyên di warê dîroka edebî de, Edebiyata Zarokan, Edebiyata Kurdî û zimanê standard, Qaîdeyên edebî di edebiyata kurdî de, Destnivîsnasî û destnivîsên kurdî, Asta tesîra rewtên fikrî yên Îslamî li ser edebiyata kurdî’ Hemû gotar divê li gorî qaîdeyên gotarnivîsiya akademîk (kurteya gotarê, destepeyvên serekî, destpêk, babet û encam) bêne nivîsandin. Li ser rûpeleke cuda divê agahiyên nivîskarî an jî nivîskaran (navê nivîskarî an jî nivîskaran, kar, pileya akademîk, berhemên çapkirî, e-mail û adresa postayê) bêne nivîsandin. Divê herî dawî heta 20’ê adarê bigihêje destê juriyê. Konferans dê 5 û 6’ê gulana 2010’an di fakûlteya wêje û zanistên insanî ya Zanîngeha Kurdistanê ku li bajarê Sineyê ye pêk bê. Navenda lêkolînên ziman û edebiyata kurdî li Zanîngeha Kurdistanê konferansê rê ve dibe û zimanê konferansê kurdî û farîsî ye. Kesên eleqedar dikarin agahiyên berfireh di vê navnîşanê de bigirin: www.uok.ac.ir/kurdlit Kurteyên gotarên ku hatine qebûlkirin dê li ser malpera Zanîngeha Kurdistanê û gotarên ku hatine qebûlkirin jî di kitêba konferansê de bêne belavkirin. SINE (Rûdawnet)